من لديه علم بهذه الأوصاف مهري جاهز

خويت درب عمري ما خذاني دونها النسيان

وانا يا اهل الملامه ما رغبت العيش وحداني

ابي لي مهرتٍ ما عسفت صغيره وبنت حصان

ابوها اللي يفك المشكله ويزبن الجاني

واخوها لا تعزوى بأسمها فزوا له العربان

يحق له الفخر في قولت آل فلان جداني

ابيها في بحر عشرين لا زودٍ ولا نقصان

ابيها اقصر طويله والوصوف اشكال والواني

ابي الجبهه كما الصبح وكما القوس اسود الحجان

وابيها ناعسات ونرجسيه سود الاعياني

ابي رمشٍ كما ريشٍ يغطي الثلج فالاوجان

وابي جفنٍ يشيل الرمش طربانٍ وكسلاني

ابي خدٍ كما وردٍ تنمى في طرف بستان

وابي خشمٍ صغير ومثل حد السيف شاماني

ابي البسمه كما البرق وثناياها كما المرجان

وشفاها جمرتين وفمّها خاتم سليمان

ابي شعرٍ مثل ذيل الفرس لا طبت الميدان

او الشلال لامن بات ليله بين الامتاني

ابي جيدٍ سوات ابريق فضه ناتقن مليان

وصدرٍ كنه مرايه عليها طلع رماني

ابي ظهرٍ كما الجدول وقدٍ مثل غصن البان

وخصرٍ مثل مجدول العنان وجسم روياني

ابيها نابية ردفٍ وبطنٍ ظامرٍ جوعان

ابيها مدمجة ساق وقدمها لسان ثعباني

ابيها بنت عزٍ من رغدها ينعم الفستان

ابي الرقه وابي الدقه لها بطرافها شاني

ابي المشيه كما اللي طالع من المعركه كسبان

وابيها ترش مع خطواتها مسكٍ وريحاني

ابي صوتٍ إلى مني سمعته كن فيه الحان

يدغدغ مسمعي ويثير كل السحر في اشجاني

ابيها حب واخلاص وهواجيس وفرح واحزان

ابيها مثل ما دكتور اهالي العشق وصاني

ابيها لوحةٍ ماصورتها ريشة الفنان

ابيها جوهره ماجابها قاصي ولا داني

ابيها تنتصر لي من زمانٍ حطني نيشان

وتبشر بالغلا اللي ما لفا به واحدٍ ثاني

مهرها قلبٍ وشعرٍ يهز القلب والوجدان

والبسها القصيد وتصبح اوزاني وقيفاني

ابي اللي فات واللي فات صعب ومن لقى العنوان

يرد العلم ولا افضل ابقى اعيش وحداني



............................