اضحك مع منفوخ فرج

انا لقيت المقاله دي على منفوخ فرج فقلت اضحكم معايا



أعزائى المشاهدين ..أهلاً بحضرررررراتكم فى حلقة جديدة والاستوديو التحليلي .. وماتنسوش ان أنا بطل مصارعة جامد وكل الناس اللى هنذيعلها ماتشات النهاردة دى أنا لاعبتهم وغلبتهم بس طبعاً للأسف الماتشات دى مش متسجلة , واللى موجود منها أنا ولعت فيه بالغلط قبل ما أبقى مزيع ووووووومعانا اتصال تليفوني
- الو ..
- الاستوديو التحليلي سعادتك.
- لأ والله النمرة غلط .
- غلط ازاي يا كابتن ؟ انا شايفك وسامع صوتي فى الدش .
- لا .. بيتهيألك .. النمرة غلط.
- ولماغلط بتفتح عليا ليه وتلبسنى مكالمة يا أخي .. مال سايب هو .
- ( يقطع عليه المكالمة بأسلوب سخيف ) ألف سلامة
(يكمل وهو بيلوح بإيده تلويحات غريبة ) : طبعاً المصارعة وحال المصارعة , وانتم عارفني راجل مصارع جامد بفهم في المصارعة كلها , ومعانا النهاردة ماتشات لأندرتكاا و ..خليل .. الراجل العملاق اللى بياكل حمارين صاحيين على الريق من غير ما يرجع .. ومعانا مكالمة تليفونية على الله ماتطلعش غلط المرة دي عشان ماتضايقش
- نقول : ألو .. مين معايا .
- معاك مصطفى حموكشة الأشرم من كفر البطيخ .
- أهلاً وسهلاً .. قل لي يعني ايه مصطفى؟ علشان أنا أول مرة أسمع الاسم ده
- والله هو كده خلقة ربنا ....أنت المهم يا رافع راسنا لأعلى من برج الجزيرة و...
- ألف سلامة .
- يا كابتن أنا لسه ماخلصتش كلامي .
- ألف سلامة .
- يا كبت...
- ألف سلامة .. إقطعوا عليه خلينا نذيع الماتشين ونخلص .
طبعاً أعزائي المشاهدين المصارعة وحال المصارعة والناس اللى بتقول عليها تمثيل دول ناس مابيفهموش حاجة والمصارعة بجد والناس اللى بتموت وبترجع تاني دي بتبقى حقيقة مش حركات وتمثيل زي البعض ما بيقول , وبعدين الأعمار بيد الله ولو راجل بقى اعترض... وووومعانا اتصال تليفوني .
- الو
- أيوة يا كابتن يا حبيبنا
- أهلاً وسهلاً
- دلوقتي حضرتك انت بتقول على الحانوتي ( أندرتكا) وأنا بسمعهم في أمريكا بيقولوا (أندرتيكر) , وخليل ..بيقولوا (كالي) .. نصدقك يا كابتن ولا نصدقهم .
- تصدقني أنا طبعاً يا بني آدم .
- أيوة بس هما أصحاب الاتحاد وبسمعهم بيقولوا أسماء تانية .
- طب هما حمير ومابيعرفوش ينطقوا أسماءهم صح عاوزني أبقى زيهم.
- طب عندي استفسار تاني بعد اذنك .. سيادتك الحزام اللى انت حاطه أدامك ده حقيقي؟ ..
- غصبن عنك.
- أصل الواد ابني بيقول انه انه لقاه بيتباع في العتبة .
- عند المحل الأولاني
- أيون
- اللى جنب بتاع العصير
- أيون
- لا ما عرفوش .. وبعدين ماتخليش ابنك يروح هناك تاني عشان لو شوفته هاعمله دي دي تي مقلوبة أوقعله ضوافر رجله .
- ماشي بس ....
- خلاص ماتلكلكش كتير ....ألف سلامة .
طبعاً زي ما حضراتكم عارفين .. بيبقى في أحقاد من البعض على الحزام ده ..هما طبعاً مش عارفين ان من غير الحزام ده البنطلون يقع ...وانه مش موجود غير في العتب.... أقصد فى الاتحاد اللى أنا كنت البطل بتاعه .. ومش أى حد على فكرة يا خد الحزام ده .. مفيش غيري أنا وبتاع 90 مصارع من أصل 91 مصارع على مستوى العالم .. يعنى حاجة صعبة جداً . وقبل مانشوف الماتش اللى جاى بتاع أوماجا,اللى هو من قبيلة الساموا , على فكرة وأعرف ابن عمه راكيشي و ليه أخت عليها حكم و أخ بيشتغل تباع فى ميكروباصات الطالبية هرم ... تعالوا الأول ناخد مكالمة تليفونية ونقول :
- الو .
- أيوة يا كابتن .. ياريت تطمنا على سينا
- سينا سينا رجعت كاملة لينا ومصر اليوم في عيد .
- لأ يا كابتن ...أنا قصدي الكابتن جون سينا وبالمرة طمنا علي شون مايكلز وقوله وحشتنا يا شون .. ألا صحيح هو كابتن شون مايكلز أخو جون سينا ؟
- لأ .. ده مجرد تشابه في الأسماء .. ألف سلامة .
فقررررة اعلانية ونرررررجع لبعض .